Sitaron Se Aage Jahan Aur Bhi Hain
- Allama Iqbal
Sitaron se aage jahan aur bhi hain
Abhi ishq ke imtihan aur bhi hain
Tahi zindagi se nahin ye fazayen
Yahan saikadon karawan aur bhi hain
Kanaa'at na kar aalam-e-rang-o-bu par
Chaman aur bhi, aashiyan aur bhi hain
Agar kho gaya ek nasheman toh kya gham
Maqamat-e-aah-o-fugaan aur bhi hain
Tu shahin hai parwaz hai kaam tera
Tere saamne aasman aur bhi hain
Isi roz-o-shab mein ulajh kar na rah ja
Ke tere zamin-o-makan aur bhi hain
Gaye din ke tanha tha main anjuman mein
Yahan ab mere raazadan aur bhi hain
No comments:
Post a Comment